Akyu hpyi garum ga

RAM MA HTE HKUNG RAN LAM:

Ga Nhpaw:
Ramma ni asak apart ram wa ai ten hta tinang a prat manang tam wa chyalu rai nga ai. Hkristan ni a prat manang tam ai/ yaw ai lam gaw prat tup na matu rai nga ai majaw, grai sadi sahka rai nna daw dan ra nga ai. “Hkristan hkungran lam” ngu ai chyum mungga hte bung pre ai hkungran dinghku de ai lam hpe, ramma ni gaw n chye n mai rai nga ai.

Dai re ai majaw, ndai laika hta Karai Kasang sharawng awng ai hkungran lam, dinghku gaw gap lam, kanawn mazum lam, madu jan yan madu wa a lit ni, prat manang tam ai lam ni, Karai Kasang a yaw shada ai lam ni hte hkungran ai lam a lachyum ni hpe sawk tam let tang madun da ai.

“Dai lam majaw lasha gaw shi a kanu kawa hpe kau da nhtawm, shi a madu jan hte kanawn manoi nga na rai nna, shan lahkawng gaw hkum shan langai sha tai lu na ma ra ai.”( Ehp. 5:31)

I. Hkungran ai a npawt lam madung ni

“Dai re ai majaw lasha gaw tinang a kanu kawa hpe kau da nhtawm, shi a madu jan hte manoi nga na rai nna, shan lahkawng gaw hkum shan langai sha tai lu na ma ra ai.” (Ningpawt Ninghpang 2:24)
Hkungran ai lam: Num hte la tara shang kanawn manang tai ai.

Hkungran ai lam: Madang bung ai yan jawm shakut shaja ai.

Hkungran ai lam: Karai Kasang kaw nna kumhpa rai nga ai.

Hkungran ai lam: Karai Kasang hkrang shapraw da ai lam rai nga ai.

Hkungran ai lam: Makoi magap lam n nga ai sha, matut mahkai kanawn mazum lam hpe gaw sharawt ai .

Hkungran ai lam: Shada shagrit shanem daw jau lam ra kadawn nga ai.

Hkungran ai lam: Hkungran num yan la hpe hking shaga ai[chalange] rai nga ai.

Hkungran ai lam: Mayam zawn shada daw jau kanawn mazum matut mahkai ai rai nga ai.

Hkungran ai lam: Lit hte madang n bung ai lapran e, maren mara bung ai hku shada jawm kanawn mazum ai.

Hkungran ai lam: Rawt jat galu kaba wa na matu shada jawm pawn ba ai rai nga ai.

II. Hkungran ai ngu ai idea, masa gara kaw nna byin pru wa a ta?

Ningpawt Ninghpang 2:18-25.... “ Bai Yehowa Karai Kasang gaw, Dai lasha gaw shi hkrai nga na n mai ai; shi hte ram ai nrum ntau shi a matu ngai galaw na we ai, nga ai.”
Marku 10:6-9.... “ De a majaw lasha gaw kanu kawa hpe kau da nna, shan lahkawng gaw hkum shan langai sha tai lu na ma ra ai.”

Hkungran ai lam gaw shawng npawt kaw nna nan Karai Kasang a idea masa rai wa sai re. Ndai gaw Eden sun kaw na dingsa sai hkungran poi( Adam yan Ewa hpe hkungran ya ai) gaw, ya, dai ni jahtum na hkungran poi (dai ni du hkra galaw nga ai Ga Shaka hkungran ai lam) du hkra lali (fresh) rai taw nga ai. Hkungran ai lam gaw Karai Kasang kaw nna shaman da ya ai hte, chyoi pra ai kanawn mazum lam rai nna, kadai mung hkungran ai lam hpe ahpa atang n mai shang nga ai.

III. Hkungran ai lam hpe Karai Kasang gaw hpa majaw galaw wa a ta?

Ningpawt Ninghpang 2:18-25.... “Bai Yehowa Karai Kasang gaw, Dai lasha gaw shi hkrai nga na n mai ai; shi hte ram ai nrum ntau shi a matu ngai galaw na we ai, nga ai.”

Prat a kanawn manang tai na matu Karai Kasang galaw wa ai re.
Ningpawt Ninghpang 1:28 .... “Shaloi Karai Kasang gaw shan hpe tsun mu ai gaw, Nan kashu kasha shaprat nna mayat maya wa mu; ga ting hpe jahpring nna dai hpe up nga lu mu:”
Malahki 2:15.... “ Karai Wa gaw, Wenyi naw ngam nga ti mung, langai sha hpe hpan da wu ai, n rai ni? Hpa majaw langai sha hpan da a ta? nga yang, Karai Kasang hte ging dan ai amyu hpe tam nna, hpan da nu ai”

Kashu kasha ni galu kaba lu na matu kaja dik htum ai makau grup-yin hpe gaw gap ya ai lam re. Hkungran ai lam gaw, tsaw ra myit hte kanawn mazum ai hku nna, ma ni hpe tsaw ra myit a lam sharin la lu na hpe karum ya na matu hkrang shapraw da ai rai nga ai. Kanu kawa ni shanhte a kashu kasha ni a man e, Yesu Hkristu a tsaw ra myit kasi hpe madun na matu hkrat sum mat ai shaloi, kade yawn hpa rai nga ai kun?

Ehp.5:31-32.... “Dai lam majaw lasha gaw shi a kanu kawa hpe kau da nhtawm, shi a madu jan hte kanawn manoi nga na rai nna, shan lahkawng gaw hkum shan langai sha tai lu na ma ra ai. Ndai lam gaw sung htum ai lam kaba rai nga ai : shing nga ai gaw Hkristu a lam hte dai Hpung a lam hpe ngai tsun nga nngai.”

Karai Kasang gaw hkungran ai lam hpe Hkristu hte Naw ku hpung a kumla hte maren gaw gap da sai. Hkungran ai lam langai mi gaw Karai Kasang a npu kaw taw nna, Karai Kasang gaw shi a naw ku hpung hte gara hku matut mahkai nga ai lam hpe, dai num yan la(dinghku) gaw grai chye na ra nga ai. Sharin ya ging ai.

IV. Hkungran ai lam gaw kaning re ai kanawn mazum lam rai ging a ta?

Ningpawt Ninghpang 2:18.... “ Bai Yehowa Karai Kasang gaw, Dai lasha gaw shi hkrai nga na n mai ai; shi hte ram ai nrum ntau shi a matu ngai galaw na we ai, nga ai.”
Hpaji Ningli 4:9-12.... “Marai langai sha hta, lahkawng gaw grau mai nga ai: kaning rai nme law, shan lahkawng gaw tinang a amu majaw mai kaja ai shabrai lu la na ma ai. Langai mi kataw yang, langai mi shadaw na ra ai:”

1Kor.11:3.... “ Rai ti mung, lasha nlang hte a baw gaw, Hkristu rai nga ai, numsha a baw gaw lasha rai nga ai, Hkristu a baw chyawm gaw, Karai Kasang rai nga ai hpe nanhte chye myit ga, ngai ra nga nngai.”

Mahte 19:4-6.... “Shi gaw, Shawng nnan e hpan da ai wa gaw, lasha yan numsha hpe hpan da mu ai rai nna,5 De a majaw lasha gaw shi a kanu yan kawa hpe kau da nhtawm, madu jan hte kanawn nna, shan lahkawng gaw hkum shan langai sha tai lu na ma ra ai, nga nna shi tsun ai ga hpe nanhte n hti yu myit ni? 6 Dai majaw shan gaw, lahkawng rai nga ma ai n rai, hkum shan langai sha rai nga ma ai. Dai rai nna, Karai Kasang matut da nu ai hpe, masha gaw n jahka kau u ga, ngu nna htan wu ai.”

Hkungran ai lam gaw, marai lahkawng hpe langai sha tai let arau sha magam bungli galaw ai hku nna grau ni htep hku hkau kanawn mazum na matu, rai nga ai. Dai hta e, shada kam hpa hkat ai lam, madi shadaw hkat ai lam, makawp maga hkat ai lam, shada shalan shabran ai lam, shada lit la ai lam lawm nga ai.

V. Kabu gara awng dang ai hkungran ai lam a ahkyak madung ni gaw hpa re ta?
Yawshu 24:15... “Gara hpe mahtang jaw jau na gaw, dai ni jang lata la mu: ngai hte nye a nta masha ni chyawm gaw Yehowa hpe jaw jau na ga ai law,”

Kahkyin gumdin let Karai Kasang hpe daw jau na matu rai nga ai.
Ga Shagawp 5:18-19... “Na a ram prat na mădu jan hte rau pyaw nga u:... Shi a mădoi chyu hpang nang hpe tut tut shăpyaw nga u ga: Shi hte tsaw ra hkat ai hta, tut nawng myit dik nga u.”

Heb. 13:4... “ Hkungran ai lam gaw, yawng mayawng a man e arawng lu u ga; hkungran ai yup ra mung, san seng nga u ga: kaning rai nme law, hpye ai amu galaw ai ni hte num shaw la shaw ai ni hpe, Karai Kasang tara dara na wu ai.”

Kang ka sadi dung ai lam rai nga ai. Sadi dung kang ka ai lam n nga ai rai yang, kamhpa ai lam ajet mung, shing n rai, kata lam kanawn mazum lam mung n mai lu la na re.
Mahte 19:4-6... “Dai majaw shan gaw, lahkawng rai nga ma ai n rai, hkum shan langai sha rai nga ma ai. Dai rai nna, Karai Kasang matut da nu ai hpe, masha gaw n jahka kau u ga, ngu nna htan wu ai.”

Ap nawng daw jau ai lam rai nga ai.

Rom.15:1-2..“Anhte langai hte langai tinang a manang wa a ngamu ngamai na lam tau yu nna, shadaw shangang rai hkra shi hpe shapyaw nga ga.”
Hkungga nawng jau ai lam rai nga ai.

Rom.15:5-7... “Ya, anhte a Madu Yesu Hkristu a Kawa rai nga ai, Karai Kasang hpe, myit mang langai sha hte n-gup ga langai sha e shakawn kungdawn nga lu myit ga, Hkristu Yesu a jaw e nanhte shada da myit mang ara sha rai nga lu u ga, shakut sharang ya ai hte shangwi shapyaw ya ai a Karai Kasang gaw, nanhte hpe awn nga u ga law. Dai rai nna Karai Kasang a hpung shingkang a matu mara, Hkristu gaw anhte hpe hkap hkalum la mani ai hte maren, nanhte shada da hkap hkalum la mu.”

Langai hte langai a n bung ai lam ni hpe chye na ya ai hte shada shagrau shatsaw hkat na matu rai nga ai.

Ehp.5:21-33... “Hkristu hpe hkrit kamyin ai hte nanhte shada da a npu e a taw nga mu.”

Shada shagrit shanem let daw jau ai lam rai nga ai.
1Kor.13:1-13... “Tsaw ra ai myit gaw galoi mung htak chye ai n rai”

Tsaw ra ai myit rai nga ai.
Yaku 5:16... “nanhte a yubak mara hpe shada da shapraw dan nna, shada da a matu mara akyu hpyi nga mu.”

Matut mahkai ai lam rai nga ai.
Ga shagawp 31:31... “Shi lăta a shăbyin ai akyu shi hpe jaw u; Shi gălaw ai amu, măre chyinghka hta, shi hpe shăkawn u ga.”

Manang wa a manu(value) hpe rawt jat galu kaba wa na matu, ngang grin ai sharawng awng lam hte gaw sharawt hkat ai lam rai nga ai.
1Kor.7:3... “ Madu wa gaw htung hte maren madu jan hte kanawn u ga, Madu jan mung dai hte maren madu wa hte rai u ga”

Shawlumon a mahkawn 1:2-4,12-13... “Shi gaw, shi pup ai hte ngai hpe pup ya u ga; Na a sumtsaw sumra gaw, tsabyi jahku hta grau kaja nga ai.... Ngai tsaw ra ai wa mahtang, nye sinda lapran e tsat ai Mura nhtan hte bung nga ai.”

Hkam kaja ai num la kanawn mazum hkat ai asak hkrung lam rai ra nga ai.

VI. Madu wa gaw madu jan hpe gara hku hkap la ging nga a ta?
Ga Shagawp 18:22... “Mădu jan lu ai wa gaw mai kăja ai hpe lu nu ai rai nna, Yehowa a chyēju hpe hkam la nu ai.”

Hpaji Ningli 9:9... “ Jan a npu e Karai Kasang nang hpe jaw da ai kaman lila prat a nhtoi ni hta e, nang tsaw ra ai madu jan hte rau, na a prat htum hkra ngwi pyaw ai hte nga sha nga u: da ndai gaw, nang hkrung nga ai laman e, jan a npu e nang galaw ai amu a kamhtaw rai nga ai.”

1Pet.3:7... “ Dai hte maren, lasha ni e, chye chyang ai hku hkan nna, n-gun kya ai hkum hkrang ngu ai numsha hte rau kanawn mazum nga mu: nanhte a akyu hpyi ai ga gang kau ya ai n hkrum myit ga, nanhte hte maren asak a sali wunli akyu lu la na ni hpe zawn, shanhte hpe hkungga lara di mu.”

Ehp. 5:21... “ Hkristu hpe hkrit kamyin ai hte nanhte shada da a npu e a taw nga mu. “

Madu wa ni gaw, shanhte a madu jan ni hpe kaja wa ap nawng ai, machyi hkam ai hte, tsaw ra ging nga ai. Hkristu gaw, anhte a matu si hkam ai hku nna, madun dan sai hte maren, sung htum ai tsaw ra myit rai ra ai.

VII. Madu jan gaw madu wa hpe gara hku hkap la ging nga a ta?

Ga Shagawp 31:11-12... ” Shi a mădu wa shi hta hpa nga nna, Shi gaw mătsan măyan n hkrum na ra ai. Shi gaw, shi a prat dingsa mădu wa a mătu, N kăja ai n rai, kăja ai hku hkrai, tam nga ai”

Ehp.5:22-24... “ Numsha ni e, dai Madu hpe daw nga ai zawn, tinang madu wa a hkang ai hku hkan nga mu : kaning rai nme law, Hkristu gaw dai Hpung a baw rai nga ai zawn, dai madu wa mung madu jan a baw rai nga ai : Hkristu shi hkum nan dai hkum hkrang a Hkye hkrang la ai Madu rai nga ai. Dai Hpung gaw Hkristu a npu e taw nga ai hte maren, madu jan ni mung lam shagu hta e madu wa ni hkang ai hku hkan nga u ga.”

Madu jan gaw, madu wa hpe machyi hkam ai ap nawng ai hku nna tsaw ra ging ai re. Madu wa hpe karum ningtum ai, madi shadaw ya ai, kam hpa ai hte, madu wa hpe up hkang shangun let, shi a npu hta taw ai. Hkristu zawn ap nawng tsaw ra ai lam re.

VIII. Sadi dung ai hkungran ai lam a ahkyak madung gaw hpa rai nga ta?

Malahki 2:15-16... “ Karai Wa gaw, Wenyi naw ngam nga ti mung, langai sha hpe hpan da wu ai, n rai ni? Hpa majaw langai sha hpan da a ta? nga yang, Karai Kasang hte ging dan ai amyu hpe tam nna, hpan da nu ai. Dai re ai majaw, nanhte gaw tinang a wenyi hpe sadi nna, brang ram prat na madu jan hpe hkalem hkalau ai hku, hkum di myit.”

Madu wa gaw shi a madu jan hpe sadi dung na matu Karai Kasang hkang da nga ai. Hpaji jaw ai lam n re.

Ga Shagawp 5:15,18-19... “ Na a hka htung na ntsin hpe, Na a hka hpawk na lăwi ai ntsin hpe, a lu nga u. Na a hka hpawk shăman ai hkrum nna, Na a ram prat na mădu jan hte rau pyaw nga u: Shi gaw tsaw ra ai ding kănu hte tsawm htap ai shan nga yi zawn rai nga nna, Shi a mădoi chyu hpang nang hpe tut tut shăpyaw nga u ga: Shi hte tsaw ra hkat ai hta, tut nawng myit dik nga u.”

1Kor. 7:2-4... “rai ti mung, hpye ai amu koi na matu, la langai hte langai tinang a num lu u ga, num langai hte langai tinang a la lu u ga. Madu wa gaw htung hte maren madu jan hte kanawn u ga, Madu jan mung dai hte maren madu wa hte rai u ga. Madu jan gaw tinang hkum hpe n up lu ai sha, dai madu wa she up nga ai; dai hte maren, dai madu wa mung tinang hkum hpe n up lu ai sha, madu jan she up nga ai.”

Heb. 13:4... “Hkungran ai lam gaw, yawng mayawng a man e arawng lu u ga; hkungran ai yup ra mung, san seng nga u ga: kaning rai nme law, hpye ai amu galaw ai ni hte num shaw la shaw ai ni hpe, Karai Kasang tara dara na wu ai.”

Madu jan hte madu wa ni gaw langai hte langai sadi dung ai hte, shada shagrau shaa hkat lu na matu hte myit dik myit pyaw na lam ni hpe tam nga ra nga ai.

IX. Kaja ai madu wa/madu jan gaw kaga ni a matu grau ai shaman chyeju ni hpe la wa ya nga ai.

Ga Shagawp 31:10-31... “Sări rawng ai num hpe kădai wa mu lu a ta? Shi gaw lung seng hta grau hpu nga ai.”

Ga Shagawp 31:11... “ Shi a mădu wa shi hta hpa nga nna, Shi gaw mătsan măyan n hkrum na ra ai.”

Ga Shagawp 31:12... “Shi gaw, shi a prat dingsa mădu wa a mătu, N kăja ai n rai, kăja ai hku hkrai, tam nga ai.”

Hpaji Ningli 9:9... “Jan a npu e Karai Kasang nang hpe jaw da ai kaman lila prat a nhtoi ni hta e, nang tsaw ra ai madu jan hte rau, na a prat htum hkra ngwi pyaw ai hte nga sha nga u: da ndai gaw, nang hkrung nga ai laman e, jan a npu e nang galaw ai amu a kamhtaw rai nga ai.”

Ya hpang de na a madu jan/madu wa nang hpe lama ma shapawt ai rai yang, shi nang hpe la wa ya ga ai , grai manu dan la ai ahkying aten ni, kam hpa wa ai ni, myit pyaw myit dik shangun wa ai lam ni, ra kadawn nga ai lam ni hpe jahpring shatsup ya wa ai lam ni, karum ningtum wa ai ni, kabu pyaw hpa lam ni jaw ya wa ai hpe bai myit dum shingran nga u!

X. Hkungran num/la prat manang lata ai hte seng nna chum laika hta gara hku tsun da a ta? Hpa majaw hkungran manang wa hpe anhte sadi let lata ging a ta?

Tara Agyi 14:3... “Kanu yan Kawa chyawm gaw, Matu n gadoi ai Hpilisti amyu num nang sa la na gaw, anhte amyu shada hta na, na a mayu kasha num langai mi mung n nga sa ni? ngu mu ti mung, Samson mahtang, Nan dai she hpyi ya mi, ngai grai ra da we ai, ngu nna kawa hpe tsun wu ai.”

1Hk.Hk.11:2…. “dai amyu ni a lam Yehowa gaw Israela kashu kasha ni hpe, Nanhte gaw shanhte hte n mai kanawn, shanhte mung nanhte hta n lawm u ga; gaja wa shanhte gaw nanhte a myit masin hpe shanhte a Hpara ni hpang de shadam kau ya na myit dai,ngu nna tsun ti mung, Shawlumon gaw shanhte hta sumtsaw sumra hte a manoi nga ai.”

Ezra 9:2... “ Kaning rai nme law, dai amyu masha ni a shayi sha ni hpe, tinang a matu mung, kashu kasha ni a matu mung, shanhte hkungran la nna, dai chyoi pra ai amyu gaw, maigan amyu ni hte kayau kaya nga ai hta n-ga, mung du ni hte agyi salang ni, grau nna dai lam hta shut hpyit nga ma ai, nga nna ngai hpe tsun dan mi ai.”

2Kor.6:14... “ N kam n sham ai ni hte rau nhtan shai ai kandang hpe hkum jawm hpai mu: kaning rai nme law, ding man ai lam gaw, tara n hkungga ai lam hte hpa seng a ta? Nhtoi gaw nsin hte kaning rai kanawn lu a ta? “

Anhte a hkungran manang gaw anhte hpe tsaw ai de gaw gap ya lu ai hte, anhte hpe mung jahten kau ya lu nga ai. Chyum laika gaw anhte hpe n kam sham ai ni hte dinghku n de na matu n-gun jaw nga ai. Hpa majaw nga yang, dai gaw anhte a makam masham kaw nna tsan mat wa hkra shakut na matu grai loi nga ai. Makam masham bung ai kaga langai mi hpe anhte hkungran na nga yang, dai gaw jaw ai hkungran ai lam rai nga sai re.

XI. Karai Kasang gaw shi hte anhte a kanawn mazum lam hte hkungran lam hpe gara hku shingrau/dingdaw dan a ta?

Esaia 54:5-6... “Kăning rai nme law, nang hpe Hpan da ai wa gaw, na a mădu wa rai nga ai; shi a amying gaw, Zaw nawng zaw wa up ai Yehowa rai nga ai: nang hpe Hkye Hkrang la ai wa gaw Israela a Chyoi pra ai wa rai nga ai; mungkan ting a Kărai Kăsang shi hpe ngu na mă ru ai. Kăbai kau hkrum nna gawng run hkawm ai hte, ram prat ē jan tai nna, jăhka kau hkrum ai num hpe zawn, mădu jan bai tai na, Yehowa nang hpe shăga nit dai, nga nna na a Kărai Kăsang tsun nga ai.”
Yeremia 3:20... “ Israela dap ē, mădu jan gaw mădu wa hta sădi n dung ai hte măren, găja wa nanhtē gaw ngai hta sădi n dung myit dai, nga nna Yehowa tsun ai.”
2Kor.11:2.. “ Kaning rai nme law, Karai Kasang a nja nhpra ai hte maren, ngai nanhte a lam nja nhpra rai nga nngai; nanhte hpe hkawn sek hpe zawn Hkristu kaw jaw ya nna, madu langai sha hte ngai nanhte hpe hkungran ya ma de ai.”

Karai Kasang hte anhte a kanawn mazum ai lam gaw hkungran ai lam hte bung nga ai hte, shada tsaw ra ai hta, shada sadi dung ai hte galoi mung lit la ai lam amahkam ai lam hta madung tawn nga ai.

“ Dai lam majaw lasha gaw shi a kanu kawa hpe kau da nhtawm, shi a madu jan hte kanawn manoi nga na rai nna, shan lahkawng gaw hkum shan langai sha tai lu na ma ra ai.” (EHP.5:31)

Ga shaka: : “Ndai nye a hkra lata matut jum da nga ai.........hpe, Karai Kasang a mung ga nga ai hte maren, hkungran la nna, nye a hkum hte maren, shi hpe tsaw ra nna, kungga lara, lanu lahku makawp maga nga na nngai. Hkam kaja timung, machyi makaw hkrum timung, lusu nga mai timung, matsan mayan hkrum timung, lam shagu hta rai timung, kaga num/la ni hpe n masem ai sha, prat tup jaw lup na nye a hkungran num/la majing shatai sa na ni ai.”

Karai sharawng awng ai dinghku tai lu hkra, Karai a mung ga hte maren, Karai man hta ga shaka la let, awng dang ai Hkristan dinghku ni hpe gaw gap sa wa lu na hpe yaw shada let,

Hkristu a grau htum ai magam hta,

Rev; Pausa Gam Hpang
Du Mare, Myitkyina

Shamyet Shanat laika ni; (Illumina Gold ,encyclopaedia, Chyoi pra ai Chyum Laika)

Shaning ning nan

Chyum Masa: Chyum laika hku yu ga nga yang daw masum hku mu lu na re. 1. Nlung nnan sha ai masat, 2. Egutu kaw na lawt wa ai masat hte 3. Yesu a hkam la ai sharin acyin la hta mahta nna sawn yu mai nga ai.

1. Chyum laika a shawng shawng daw hta Ka-in hte Abela a hkungga Karai Kasang kaw nawng ya ai lam gaw Festival byin wa sai. Dai majaw, laning mi a nsi nai si hte chyeju shakawn ai lam hta Karai Kasang a ra sharawng ai hte nra sharwng ai hpe daw dan ai ten rai nga ai. Dai majaw, kaja tim n kaja tim, Karai Kasang ra sharawng ai byin wa hkra gaw shinggyim masha ni myit ra wa sai.

2. Egutu kaw na pru wa ai aten hpe shalai wa ai poi hku Yuda masha ni shaning shagu galaw ai. Shanhte a shaning nnan gaw amyu nnan gaw de hpang ai ningdaw langai rai nga malu ai. Dai hte seng nna, Yuda ni a shaning hti ai hte nhtoi hti ai lam gaw ya na Calenda hte shai ai lam mung nga nga ai. Shanhte mung, Lamu kap shata or Luna calenda hku yu ma ai. Lani mi ngu ai nhtoi gaw jahpawt jan pru ten kaw nna, shana jan shang ten du hkra sha re. Dai hte maren, shata mi ngu ai mung nhtoi 29.5 sha rawng nna, laning mi hta nhtoi 354 rai nga ai.Masha si yang, dai shani lup ra ai or jan garai nshang yang lup ra ai ngu ai gaw, hpang shani ngu ai hpe ndu shangun mayu ai lam rai nga ai.

3. Yesu a shaning nnan gaw shani shagu hte aten shagu re lam tsun ai. Dai gaw masha ningnan tai nga na lam sha re. Hpawt ni ngu ai hpe mung hkum tsang, mani ngu ai hpe mung hkum myit , ya ngu ai byin nga ai aten ladaw hpe chye na nna hkan sa nga mu [Mahte 16:2-4]. Du wa na ten hta hpa byin na gaw, nanhte hte nseng ai. Ndai prat na lam hpe chye yu ginhka nna hpa galaw ra ai hpe dum mu; nga ai rai nga ai. Ntsa malen u ni hte prang na hkalaw pan hpe gasi madun nna mung shadum da sai. Ndai lam gaw, shaning nnan, dingsa ngu ai hte shai wa sai. Asak hkrung lam hte kapyawn ai machye machyang lam rai wa sai.

[Shakawn kungdawn 8:5] hta shinggyim masha hpe Karai Kasang hta loi hprut di nna hpan da sai nga ai hte gindun nga ai. Dai gaw, hpaji rawng ai hku nga mu, nga ai rai nga lu ai. Wisdom ngu ai hpaji hte nga jang Karai wa hte loi hprut re ai power atsam hte hpring na rai nga ai. Shaloi, ndai power hpe anhte ni gara hku lu na? power gaw knowledge re, knowledge gaw power re, nga nna Beacon [1561-1626] tsun ga ai. Ndai power lu na matu action ngu ai magam bungli hte kapyawn nga ai. Magam bungli gaw sharin la ai machye machyang hte kayau nga ai rai nna, dai machye machyang gaw mungkan a makoi magap nga ai arai ni hpe mu lu na lam rai nga ai. Dai arai ni hpe mu lu ai ni gaw, hpaji rawng ai ni tai nna hpaji dai gaw magam bungli hte hkrang shapraw dat ai shaloi, power ngu ai byin wa sai. Dai power gaw Karai Kasang hte loi hprut re ai shinggyim masha power rai nga ai.

+++More+++Ndai kaw dip dat u+++

Malaysia na manau poi

FRASER'S HILL de Hkrismas rawt sai

Katsi pyaw ai du hkra ladaw hte nshung hkrismas hkap tau na ginra Fraser hill,No.2 England re nga nna Gum hkawng ai Malaysia a shara myi rai nga ai.

Dai ning 2009 Hkrismas poi gaw FRASER'S HILL resort de Hkrismas manau nau na matu ram ma kaji kaba yawng tsa kaba lam rawt sa mat wa sai.

Dr.Winna hte Karai a magam lam hta lam woi ya nga ai sara/sara num ni hpe hkung ga jaw dat ai.

Shawng nnan Karai Magam lam hta woi awn la lai wa sai sara,sara ma ni yawng hpe grai chye ju dum ga ai.
Sara Num Dr.Winni Zan Hta,( MCF )
Rev: Pausa Gam Hpang,( MKBC )
Rev: Ding Shu La hkawng,(MKBC ) yaten woi awn nga,

Ndai sara sara Num ni gaw Yawng KBC hpung masha ni rai nna,Karai a Kabu gara mung sha sha nnrai,Myu sha ni a galu gaba lam mung ga hte mung woi awn myit sharawt laiwa sai ni re.

ngam ai Karai a mung dan lam hta gaw gap lawm ai hpung woi myit su ni yawng hpe mung chye ju dum nga ga ai.
MKBC hpung masha langai

KARAI KASANG A KASHA NI

Chyum Laika ni hta nna, nanhte htani htana asak lu la na re ai, nga nna myit myit dai majaw, dai laika ni hta mahtai hkan sawk yu yu rai myit dai: Dai laika ni nan nye a lam sakse hkam nga ai: Dai re ai mi , asak hkrung ai lu la na matu nanhte gaw ngai hpang de n sa mayu myit dai. (Yawhan 5-39-40)

Good girls go to heaven, bad girls go everywhere nga ai English ga na ga ai. Kaja ai masha sumsing lamu mungdan de du na ngu ai gaw majoi mi shadu ai she re. Hpa majaw nga yang kaja ai masha shagu sumsing lamu mungdan de shang lu na n rai. Karai Kasang a kasha ni sha sumsing lamu mungdan hpe sali wunli hkam la lu na rai nga ai. Nkau mi gaw, chyum laika na Lazaru hte saahti wa a ga shadawn hpe la nna, sutgan lu su ai ni sumsing lamu mungdan de n shang lu na, matsan ai ni sha shang lu na nga nna myit la chye ma ai. Nkau mi gaw, sutgan lu ai shabrang wa hpe shi a sutgan dut kau nna, matsan mayan ni hpe gam jaw nhtawm, Madu Yesu hpang de hkan na matu shaga ai shaloi graai yawn ai hte nhtang mat ai majaw sutgan lu su ai ni sumsing lamu mungdan de shang na hta gawla-uk mahtang samyit na hku lai na grau loi nga a hka! ngu tsun ai hpe la-kap nna, sutgan lu ai arang madu ni sumsing lamu mungdan de n lu shang na re, nga lachyum hpyan la chye ma ai.

Karai Kasang a sumsing lamu mungdan de shang lu na matu sutgan lu su ai, matsan ai hte n seng ai. Kaja ai, n kaja ai hte mung n seng ai. Mahte 5:3 hta,"Wenyi hta matsan mayan rai nga ai ni gaw, A lu ma ai; Kaning rai nme law, sumsing lamu a mungdan, shanhte a mungdan rai nga malu ai," ngu ai gaw Zake zawn sutgan law law lu su nna wenyi hta matsan mayanghkrum nga ai masha ni hpe tsun mayu ai rai nga ai. Wenyi hta matsan mayan hkrum ai hte ja gumhpraw sutgan matsan mayan hkrum ai kaga ga re ai hpe chye na ra ai. Ja gumhpraw sutgan matsan ai gaw sumsing lamu mungdan de shang na lakmat, passport hte visa ngu n mai myit la ai.

Sutgan lu su ai saaahti langai mi, shing n rai, arawng aya kaba ai masha langai mi a lam na yu ai hte mu yu ai, n bung ai. Dai myitsu wa hpe mu yu ai hte shi hpe chye ai mung n bung ai. Dai wa hpe chye ai hte chye hkat ai mung n bung ai. Dai wa hte chye hkat ai lam hte hkau hkau ai n bung ai. Dai wa hte hkau chyap ai lam hte dai wa a jinghku majing tai ai mung garai n bung ai. Dai wa a jinghku kaja tai ai hte dai wa a kasha tai ai mung garai n dang bung madawm ai. Sutgan lu su ai wa, shing n rai masha kaba langai mi a sutgan salai wunli hkam la na wa gaw shi a kasha rai nga ai. Kaga masha ni kade kaja tim, kade myitsu tim, kade hpaji chye tim, kade kung hpan tim, kade tsawm htap tim, kade mying gumhkawng tim, mungkan masha ni a matu akyu rawng magam bungli hta kade daram daw jau tim, dai saahti wa, dai du kaba ai dum nta sutgan hpe sali wunli hkam la lu na n rai. Masha nkau mi Karai Kasang a lam n na yu ai. Masha nkau mi Karai Kasang a lam chye ai. Grai chye ai. Mahattma Gandhi mung Yesu HKristu a lam grai chye ai. Hkristan ni a arawn alai hpe n kam yu ai majaw Hkristan n tai ai nga ma ai. Madu Yesu prat na masha nkau mi Madu Yesu hpe grai chye ma ai. Rau nta e kaba wa ai kanau kajan ni Madu Yesu hpe kahpu ba langai mi hku grai chye ma ai. Hparishe, Sduke, Chyum Laika ka sara ni, Herod hkawhkam, Pilat hkawhkam ni Madu Yesu hpe mu yu ma ai. Chye mung chye nga ma ai. Masah nkau mi Madu Yesu hte hkau chyap ma ai. YudaIskarut gaw Madu Yesu hte masum ning chyen rau hkawm rau sa lai wa sai. Madu Yesu hpe chye ai ni, n chye ai ni, hkau chyap ai ni, rau hkawm rau sa ai ni law law masha kaja ni rai ma ai. Chyum laika grai chye ai ni lawm ma ai. Chyum laika ningkrin ni lawm ma ai. Grai matsan ai ni lawm ma ai. Shanhte yawng hte wa sumsing lamu mungdan de shang lu na ma ni?

Karai Kasang a sumsing lamu mungdan hta shang nna sali wunli hkam la lu na matu, Karai Kasang a kasha tai ra ai. Dai lam hpe Karai Kasang gaw Kasha shingtai Madu Yesu Hkristu hku nna ahkaw ahkang hpaw da ya ai. "Shi a amying ningsanghpe kam sham ai ni ngu ai, shi e hkap la mala ni hpe, Karai Kasang a kashu kasha tai lu na ahkang shi jaw mu ai. Dai ni gaw asai hte shaprat ai ni n rai, hkum shan a myit hte mung n rai, masha a myit maw ai hku hte mung n rai, Karai Kasang e shaprat ai ni she rai ma ai,"(Yawhan 1:122-13). Hanson gale ai Jinghpaw Chyum Laika hte Karai Kasang a kashu kasha ni ngu nna ka da ai. English Chyum Laika hta gaw children of God (Karai Kasang a kasha ni) ngu nna ka da ai. Gaja wa n ga yang, Karai Kasang gaw kashu lu ai n rai, yawng gaw Madu Yesu hpe hkap la kam sham nna Karai Kasang a kasha ni hkrai re ai lam Billy Graham tsun shadum ai.

Madu Yesu gaw anhte hpe jep ai tara kaw na shalawt dat saai majaw, anhte gaw sali wunli hkam la ging ai Karai Kasang a kasha ni tai wa ai lam, kasa Pawlu mung ka da ai(Galati 4:7). Gaja wa nga yang, Hkristu a marang e anhte gaw Karai Kasang bau la ai kasha ni(adopted children) tai nna, Hkristu hte rau sumsing lamu mungdan sali wuli hpe jawm hkam la ging ai ni tai wa saga ai (Roma 8:17).

Dai ni mungan ntsa e, Madu Yesu hpe n chye ai ni masha kaja grai nga nga ma ai. Dai ni gaw Hkristan ni hta grau myitsu nna, grau kaja ma ai. Mungkan shinggyim masha ni a matu akyu rawng ai magam law law hta grau ap nawng daw jau lu ma ai. Karai Kasang a mungga mung Hkristan ni hta grau chye ma ai. Moi na Hparishe, Saduke ni hte Chyum Laika ka ai sara ni mung Karai Kasang a mungga hpe shani shagu sawk tam ma ai. Rai tim, dai chyum laika ni hta tsun da ai Madu Yesu hpe shanhte n kam sham, n hkap la ma ai. Madu Yesuhpe hjkap la ai wa gaw, Karai Kasang a chyeju san san hte Karai Kasang a kasha tai lu ai majaw, sumsing lamu mungdan de shang lu na rai nga ai.

Nang gaw, Karai Kasang a lam n na yu ai wa kun? Karai Kassang a lam soi sam na yu ai wa kun? Karai Kassang a lam grai chye ai wa kun? Karai Kasang hpe mu yu ai wa kun? Karai Kasangh te rau hkawm sa yu ai wa kun? Karai Kassang a jinghku kun? Karai Kasang a kasha kun?....
(Rev. Dr. LC KhaLum)

Hkalup Hkam ai Hte Nawku Hpung( bumsiwa Karai Masa ) hpe hti yu ga

U.S Sasana myi man matsan mungdan ni de sha-ang

U.S. Evangelicals Urge Focus on Global Poverty

Longwood Nawku Jawng kaba kaw na Hpung Up sara Joel Hunter (Mungkan Sasana Hpung malawm) wa gaw Nawku Hpung hte seng ai shiga htawn shana ai hta, matsan nga ai mungdan ni hta Sasana law law galaw ra ga ai. Dai sasana amu hta karum shingtau ai magam lit hpe numshawn tawn nna matsan nga ai kaw na gaw sharawt la na lam hpe mung myit shalawm n gun dat ra na saga ai, nga nna tsun wa ai. Ndai lam hpe grau grau nna lani hte lani tsun gara wa sai hte ya yang mungdan 45 kaw na sasana galaw nga ai nawku hpung 12,000 gaw shada hkrum bawngban let Seminars ni galaw nga sai lam Religious Today kaw na shiga shana ya nga ma ai.
Lynne Hybels ( Karum ) tsun ai hta, ndai ga baw gaw nawku hpung up sara law law a myit kata hta galai shai shangun ai lam byin sai, nga nna awng sharawng let tsun shana wa sai rai.

Ginlung Hkristmat Galaw na

Malaysia Jinghpaw Wunpawng Hkistan Hkalup hpung MKBC kaw nna dai ning 2008 Hkrismat poi hpe wuwudidi rai Portdicson ngu ai pang lai hkin gau e galaw na lam hkyen nga saga ai,

Laimat wasai 2006 ning hkrismat poi hpe mung Singapore Jinghpaw Wunpawng sha ni hte USA na sara Kaba ni du sa let awng dang ai hku galaw lu sai lam re,

Ya dai ning gaw grau nna laklai ai hku nna Ginlung Hkrismas hpe Bangkok ThailandJW,Singgapore JW,Malaysia JW,Hkristan hpung masha ram ma shayi shadang sha ni yawng gumhpawn let galaw sa wa na lamang ni nga ai,
Daire majaw Malaysia MKBC hkrismas poi de sadu shanglawm marit ngu nna mungkan ting na Wunpawng myusha ni yawng hpe saw shaga dat ga ai,

Maduyesu shangai wa sai hkrismas poi lamang hte seng nna MKBC hpung amu madu kaw nna hkumzup hkra bai shana wa na re lam mung htet shana dat nngai law.
shiga hkumhkra,
( DIP DAT U )

http://www.shanglawt.blogspot.com/



2006 MKBC X'mas sumla ni

Ramma ni ginsup nga yang

U dang